احتفالات الثورة :)

الزمان: 23 يناير- 2015

المكان: العالم الموازي

شيطان 1: وهنعمل أيه يا زعيم السنة دي عشان نحفظهم في حالة التوهان والانشغال؟

الشيطان الزعيم (ابتسامة شريرة): هنعمل الكام حاجة اللي متعودين عليهم... وهنسبلهم الباقي

شيطان 2: قصد سعادتك نندس في المظاهرات وكده؟

الشيطان الزعيم: طبعا.. نندس في المظاهرات... نعمي عنيهم عن الحقائق...ونعمي عنيهم عن الإيجابيات.. ونؤجج النقد المتبادل بين كل الأطراف...

شيطان 3: وطبعا مننساش نعمل شوية مصايب ينفع يتهموا فيها الإخوان والطرف الثالث...

الشيطان الزعيم: برافو عليك يا (3).. ده الوقود اللي بنغذي بيه نظرية المؤامرة عشان يفضلوا بيتخانقوا مع بعض بلا رؤية استراتيجية ولا تقدم...

شيطان 1: عندي اقتراح ابليسي فريد..

الشيطان الزعيم: قول يا (1)

شيطان 1: بقالنا فترة ماموتناش حد!! كل شغلنا على قضايا نسلكها براءة وقضايا نلبسها لبعض الناس...ليه منموتش حد؟

الشيطان الزعيم: فكرة.. حد عنده أخبار عن أي مظاهرات كبيرة؟

شيطان 2: آه  يا ريس في مظاهرة بس هتبقى صغيرة كده عند طلعت حرب عملينها يساريين..

الشيطان الزعيم: بس دي لو موتنا فيها حد الدنيا هتقوم جامد ويمكن يتحدوا تاني.. ومينفعش أصدقاءنا في الوزارة يساعدونا لأنهم بقوا بيخافوا..احنا بس عاوزين نعمل قلق ونخليهم مكملين في التوهان والانقسامات.. والسلبية..

شيطان 3: يا فندم خلاص .. بعد آخر براءة بدأت الأمور ترجع لطبيعتها شوية شوية... 

شيطان 2: واعتقد الناس مش هتقلب الدنيا ولا تتحد ولا حاجة... خلال الأربع سنين اللي فاتوا بعون ابليس العظيم... نجحنا نخلي الموت وحبس السياسيين شيء عادي بالنسبة للشعب.. الشعب بيحب الريس..

الشيطان الزعيم مفكرًا: تفتكروا؟؟ طيب... خلونا ننفذ..موتولكم واحد ولا اتنين كده.. بس أوعو تنسوا إن يوم 25 ده لازم نستمر في تشويهه بكل طريقة ممكنة وأوعوا... أوعوا تخلوهم يتحدوا ويبطلوا اتهامات لبعض.. ولا يتحرروا من نظرية المؤامرة... دي الطريقة اللي هنفضل مسيطرين بيها عليهم ونفضل جارين البلد دي في النازل...

شيطان 3: كل ثورة وانت طيب يا زعيم... تعيش وتقتل وتضلل وتشوه....