Thursday, February 11, 2016

للتحرر من إدمان المواد الإباحية


عاوز تتحرر من إدمان المواد الإباحية ومش عارف؟
أو عاوز تساعد حد ومش عارف؟      وئام سليم
أكيد مشكلة إدمان المواقع الإباحية كبيرة ومعقدة وأكبر من إن حد يخاطبها في بوست أو مقال قصير لأنها محتاجة كتب ومحاضرات. لكن قررت اكتب المقال القصير ده لأني عارف شباب كتير ممكن معندهمش access لكتب أو محاضرات تفصيلية للموضوع.
عاوز أقول لكل حد بيحاول يخرج من دايرة إدمان المواد الإباحية شوية حاجات:
1-    أكيد في أمل تتحرر لأن في ناس كتير اتحررت وحياتها اتغيرت. متيأسش.
2-    متعتبرش العادة الإدمانية دي كل حياتك، هي جزء من حياتك، سلبي آه، لكن أكيد في جوانب تانية.
3-    صدق إنك بقوة الله ومساندة الآخرين وقوة إرادتك تقدر تتغير. دول الـ3 حاجات اللي محتاجهم.
لو انت موافق عالـ3 حاجات دول، اتشجع وكمل قراية، أنا هتكلم عن بعض الخطوات العملية للتحرر من إدمان المواد الإباحية:
1-    اكتشف الكذبة اللي انت مصدقها. اللي بيخليك تروح للمواقع دي كذبة أنت مصدقها مثلا:
-         مشاهدة المواد الجنسية fun
-         مفيهاش ضرر لحد ولا لي
-         اقدر أوقفها في أي وقت
-         حاولت كتير أوقفها ومستحيل أوقفها
-         في كذا كذبة تاني ناس مصدقاها. انت محتاج تفكر: ايه الكذبة اللي انت مصدقها وتبدأ ترفضها في ذهنك وتفكيرك وصلاتك وتعلن: أنا برفض ...... (اذكر الكذبة دي)
2-    امسك في الحق. تاني حاجة فكر ايه الحق اللي بيقوله ربنا عن النقطة اللي انت اكتشفت انك مصدق الكذب فيها. مثلا:
-         النجاسة ذل وقيد وعار (ضد كذبة إنها fun)
-         أستطيع التحرر بقوة المسيح (ضد كذبة إنك متقدرش تتحرر أو إنك تقدر تبطل وقت مانت عاوز)
-         النجاسة ضارة بذهنك ونفسيتك وعلاقتك بالله وبالجنس الآخر (ضد كذبة إنها مش بتضر حد).
لازم تفكر في كذا عباره أو آية لها علاقة بالحق وتكتبهم بوضوح في مقابل الكذب.
3-    كرر الصلاة بإعلان رفض الكذب وقبول الحق. التكرار بيعمل نوع من تغيير الذهن وتجديده. الطريقة العملية للتكرار ده إنك تعمل ورقة فيها عمودين وتكتب في العمود الأيمن الكذب وتحت الكلمة دي قايمة بالأكاذيب اللي انت قبلتها وفي المقابل في العمود الأيسر اكتب الحق، وتحت الكلمة دي قائمة بكل فكرة صحيحة مبنية على كلمة الله أو على فكر صحيح مش كذب من الشيطان.اكتب أكاذيب الشيطان خلاك تصدقها على قد ما تقدر، واكتب حق كتابي على قد ما تقدر في الناحية التانية. صلي كل يوم صلاة تعلن فيها انك بترفض الكذب الي هو ..... وبتقبل الحق اللي هو.... . وصلي الصلاة دي على الأقل لمدة 30 يوم كل يوم ويا ريت لو صمت بعض الأيام لطلب قوة الله وعمله جواك.
4-    اخرج للنور. اعترف بالخطية دي لحد ممكن يكون قائد أو مرشد شخصي أو شريك صلاة. مش مقصود أنك لازم تحكي كل التفاصيل لكل الناس لكن لازم تعرف إنك محتاج مساندة روحية ونفسية ومساندة في الصلاة. شارك مع حد واطلب مساندته ودعمه.
5-    غير برنامج يومك. يعني باختصار لو متعود تشوف قنوات أو مواقع بليل اعمل حاجة مختلفة بليل. لو متعود تنام متأخر نام بدري. شوف أكتر وقت بتهاجمك فيه الأفكار النجسة واملاه بحاجة تاني ثابتة تعملها كل يوم: رياضة، قراية، خروجة،..اللي يريحك.. ويبقى هايل لو خليت حد يساعدك ويحاسبك عالتغيير ده واستمراريتك فيه..
6-    ابعد عن المنبه اللي بيخليك تقع. مشكلة ناس كتير بتحاول تتغير وتفشل هي إنها مش بتقفل الباب قدام الحاجة اللي بتوقعها كل يوم. نفسيًا في منبه ما بيختلف من حد للتاني هو اللي بيثير جواك السلوك الإدماني وكل ما بتبقى معرض للمنبه ده العادة بتتملك منك أكتر. ممكن المنبه ده يبقى (القعدة وحدك، قنوات معينة، مواقع معينة، صورة ما، مكان مش مقدس...). فكر: هو ايه المنبه اللي لما بشوفه أو بيحصللي بيخليني أروح ناحية السلوك الإدماني الفعلي؟ ابعد عنه تمامًا. اقفل الباب قدامه، متواربهوش.
7-    الإنشغال الإيجابي للذهن. بيقول د. أوسم وصفي في كتابه الجميل (إنسان الملكوت) إن الانشغال بالتفكير في السلوك السلبي والعادة الإدمانية هو الخطوة الأولى للسقوط وهو اللي بيودينا للطقوس اللي بتشكل الخطوة التانية من دورة الإدمان المكونة من 4 مراحل متكررة (الانشغال (فكرة)-  الطقوس (البرنامج اليومي يعني التعرض اليومي للمنبه أو الشيء اللي بيوقعك)- السلوك الإدماني (العادة بتاعتك) - الشعور بالذنب)


وعشان نقدر نكسر الدورة دي محتاجين نبعد عن المنبه - زي ما قلنا، بس كما لازم نبطل الانشغال بالأمور اللي بتوقعنا. لازم تشغل ذهنك بالله، وبالحق، وبالنور، وبالحرية، وبأنشطة إيجابية ليك وللآخرين، وفي الحياة عامة. يعني بالعربي ذهنك يبقى مليان نضافة ومشغول بيها.. مش بقوللك لازم تتدروش، بس بقولك لازم تملأ يومك وذهنك بانشغالات و"طقوس" إيجابية نضيفة على مدار يومك. الذهن الفارغ فريسة للأفكار الشريرة، وفريسة للشهوات وللنجاسة. أروع انشغال ممكن تشغل نفسك بيه هو كلمة الله والعبادة وبعدهم أنشطة حياتك العادية زي الرياضة أو خدمة الآخرين بأي طريقة أو عادات جديدة نضيفة تمارسها بانتظام.
8-    تدرب على الهرب. ودي النصيحة المباشرة اللي بنشوفها في الكتاب المقدس بشكل متكرر "أما الشهوات الشبابية فاهرب منها". لما الفكرة تجيلك، متتناقش معاها. لما عينك تقع على واحدة أو صورة أو فيلم مغري متفكرش وتقول هبص بصة وامشي أو هتفرج شوية وامشي. متتناقش معاها. اجعل شعارك الهرب الفوري من أي فكرة أو صورة أو نظرة أو منبه احتمال - ولو ضعيف - يوقعك فالخطية. لو واحدة أو صورة جت قدامك غصب عنك اكتفي بالنظرة الأولى وحول عينيك عن الباطل زي ما الكتاب المقدس بيقول.
9-    التصق بيسوع. الالتصاق بيسوع لأنه حلو أعظم قرار ممكن تاخدة في حياتك. مش بقولك ابقى مدمن صلاة ولا بقولك متطلعش من غرفتك أو خليك فبيت الصلاة بس بشجعك يكون ليك وقت صلاة يومي مكرس لقراءة الكلمة والقعدة مع الرب، وخليك ملتصق بيه دايمًا 24 ساعة مش 23. مادام عطيت حياتك للمسيح، مفيش يوم انت محتاج تعيشه لوحدك، ومفيش تجربة محتاج تواجهها لوحدك، هو هيكون معاك، بس ركز معاه وانت بتعمل كل الخطوات دي.
10-  أخيرًا: كن مثابر ولا تيأس أبدًا. مفيش قيد قوة الروح القدس والحق الكتابي متقدرش تفكه، ومفيش خطية دم المسيح ميقدرش عليها، ومفيش عادة الرب ميقدرش يغيرك فيها لو تعاونت معاه. إذا سقطت، قوم وتوب، وانفض التراب عنك، وثابر في رفض الكذب، والثبات في الحق، والانشغال الإيجابي، والالتصاق بيسوع، وهتشوف تغيير صدقني، مش لأني انا الله بقول كده لكن لأن ده وعده لينا في أمثال 4: 18 "أما سبيل الأبرار فكنور متلأليء يتزايد إشراقه إلى أن يكتمل النهار."
افتكر كويس العشر خطوات دول:
الوصايا العشر للتحرر من إدمان الجنس أو المواد الاباحية:
1-    اكتشف الكذبة اللي انت مصدقها
2-    امسك في الحق
3-    كرر الصلاة بإعلان رفض الكذب وقبول الحق
4-    اخرج للنور
5-    غير برنامج يومك
6-    ابعد عن المنبه اللي بيخليك تقع
7-    الانشغال الإيجابي للذهن
8-    تدرب على الهرب
9-    التصق بيسوع
10-  كن مثابرًا ولا تيأس أبدًا.